BONKAMGIPA SALRANG ( LEOBERTH R. SANGMA )

Ia salrango an’ching bang’a janggirangni taraken gimaanganiko nikenga. Salantianong’nasipile RIP (rest in peace) amikka aski ine seata rangko FB, Instagram ugita rangko niksoenga aro poraisoenga. Jerangan an'ching nika saarang onga aro uarang anchingni katongko moata. Mande sal somoirang pringo balgaoe attamo sikrepgipa bibal gita aro dikdiksana nike gimagipa guuri ine sastroo sea. ( GIT. 90 :6 aro Jakob 4: 14) Howard Denison Momin ba uni poedo ‘” Nangko gisik ragen” ingipao’” Giting gita tangbangoba bol gisie gaakona, nitogipa mongnalan walo janggi gala,” ine janapa. Nangni aro angni bonkamani salba gnang. Anching mandeara bonninggipasan ongaia, ine Rongtalgipa Isolni kattao sea.

Gisik senggipa Solomon raja agana,’” Atchiani salna bate siani salan nambata,..Abachengana bate bonkaman nambata” ( Agan 7:,1 aro 8).Daalo naa aro angaba bonkamgipa salrango janggi tangenga ine gisikrana.Daororo Covib-19 sabisi ni asel bangen kenjagokaniko manenga,lockdown ongate, sorkari kenbegnigipa sabisini tarake giproroaniko champengna chipchapenge donna geetanirangkoba bil mangipa dol asongo pilnipil ragatenga.

Indakgipa nengnikbeani bijatchio sripna gitikgitik, janggin ringko choengo supekaniko manengo, Isolchiko dikdik niatna:

Bonkamgipa salrang inengon ia angni nangni janggi agilsako sianikosan miksongja.Indiba ian Jokatgipa Jisu Kristoni uni kurachakgimin gita Uo beberagiparangko jringjrot salgiona rimdona rebaaniko mangsonga.

Mikkang salo ba daalo onggnirangko Gitel Jisu antang aro uni sninggiparangni kurangchi aro katchinikgiparangchi bilsi 2000-na skangan agansoaha. Mittamrang mikkangchi ongbagnirangna chanchie kensoa indiba Jisu Kristoni agilsakona rebaaniara kenani -jajrengani ongja, batesa katchaani aro kadongani koborsa onga,jean uni agansoagiminrang been pilnasiaha.Jisu-ni rebaanina katchasoenggipa aro kadongsoenggiparanga Uo chongmot beberagiparang onga.Ia agilsakni sal somoirang Uni rebapilanichin bonnasienga.Jokatgipani rebaahaon, agilsakni pilak sasononi, nengnikbeaoni,saknaaoni, dukrangoni chugimik joksrangna mangnok.Jisuni Gnigipa ia agilsakona rebaengo agilsak chugimik gital ongsranggnok. Uni rebaani gimin tale roke cheem cheemde aganna manjawa,indiba chinrangko nie nike masichina anchingna Sastroo agan-mesoke donangmanaha.

Sagre rangb asakki ona:

” Nasimang Galili-ni manderang,nasimang maina salgichiko nie chadengenga ? Ia Jisuan,jeko nasimangoniko salgiona rimdoangaha,jekai nasimangoniko salgiona reangako nikaha,,uandaken rebagen” ( Wat 2:28).

Ua maina rebapilenga?

Jisu sakantiko bichal kana rebaenga.Skanggipa uni rebaanio ua jokatgipa gita rebaaha,indiba daalode ua bil gnange sason kagipa gitasa rebaenga.Ua tanggipa aro sigiparangkoba bichal kagipa onga.(2 Tim.4:1) “ aro Ua Mandeni depante ongani gimin bichal kachina Una bilko onaha.’( Ibri 9:27)

Gital Salgi aro aako rabana: Ian Jisu-ni antangni kuchakgimin gita Skanggipa salgi aro Skanggipa Aa gimagen indiba gital salgi aro aro agilsak jringjrotna dongkamgen jeon beberagiparang bak dongpagen ( Para 21:1). Uano Isol antangan uni manderang baksa onggen aro pilak mikchirangko usitgen,jeon sia,duk,grapa, aro saknaa dongjawaha maina Uan pilakkon gital ongatgen.(Para.21:3-5)Uano torom nok dongjawaha maina Isol aro Mes Bisaan uamangni torom nokdring onggen jeon sal jaba nangjawaha maina Jisu antangan tengsudapgen.

Jringjrotna sason kana: ” Jensalo Mandeni Depante antang rasongo rebagen, aro un baksa pilak sagrerang rebagen, un salo ua antangni rasongni singhasono asonggen ( Mati 25:31’).” Snigipa sagre sikaha; unon salgio gam’bee kurangrang ongaha,aro uarang aganaha, Agilsakni songnok chingni Gitelni, aro uni Kristoni ongbaaha, Ua jringjrotna raja onggen.(Para 11:15).

Maikai Rebapilenga:

Ua uni rebaani bewalrangkoba antangni sninggiparangna agane donangaha:

1. Chaugipa gita’: Unigimin mikrakbo;maina nasimangni Gitel bansalo rebagen, uko uija.Indiba iako uibo badia prohor-o chaugipa rebagen, iako nokni nokgipa uigenchimode, indide mikrakgenchim,aro antang nokko chopruna onjawachim.(Mati 24:42-43).Chaugipa baksa toe aganengo chaugipa nambatgipa bostukosa chaue kata.Ua nangni nambatgipa janggikosa rimdonasienga, beende soe gimaainagipa indiba janggi pangnajolna dongkamgipa onga.” Adimu skanggitan aaona pilangkujana, Aro janggi antangko ongipa Isolona pilangkujana kingking ( iako gisik rabo)( Agan.12: 7).’

Ong∙gnigipa Chinrang:

Jisu antangni rebapilani chinrangko bangen agane donangaha,jechin agilsakni manderang mikraksona pangnan antangtangko tarisona mangen. Uarangoni mittam chinrang: Aao ongtelaigipa obostarang: Kristoni rebana skang aao onggnigipa chinranga banggriani,akal karap ongani, sabisirang, Ia salo darangniba chanchisogijagipa Covib-19 anchingko jabrangataha.Jekon daaloba sane namatna mankuja. Tikkarangko suenganiko daaloba nikenga.(Mati24:7. Mati 22:28).Indiba ia pilakan anpakani saknaani abachenga onga.Ia chinrang agilsakni bonkamani salna abachenganisa onga aro ia obostarang uni rebapilaona barirorogen.Agilsak ongchengaonitaltal pangnaba ongkugijagipa dalbegipa chinrang Kristoni rebaon ongnasienga.

SONGSALO ONG∙GENGGIPA CHINRANG: ABonkaman salrango songsalo namgijani barigen aro bangani kasaani kansingen,ine Jisu Kristo agansoa. ( Mati 24:12).” Un baksa Timothyna Paul-ni chitti (2 Tim.3:1-5)-oba anchingna talen agana. ’ “ Iako gisikrabo, bon’’kaman salrango kalimanirang onggen.Manderang antangtangna chanchiaigiparang,tangkana kasagiparang,,gaoraa degiparang,dala dakgiparang,kasaninggijagiparang,maa-paarangko manijagiparang,mittela grigiparang,rongtalgijagparang,kragija dakgiparang,kema kagijagiparang,mitakgiparang,antangtangko rakkigijagiparang,mangnamgijagiparang,namako mitchigiparang,togigiparang,chanchisogijagiparang jangbingbanggiparang,Isolna kasaana bate sukna kasagiparang,bimingna torom manigiparang,aro uni bilko jechakgiparang onggen.Indakgiparangoni antangtangko rakkibo.

ABonkaman salrango songsalo namgijani barigen aro bangani kasaani kansingen,ine Jisu Kristo agansoa. ( Mati 24:12).” Un baksa Timothyna Paul-ni chitti (2 Tim.3:1-5)-oba anchingna talen agana. ’ “ Iako gisikrabo, bon’’kaman salrango kalimanirang onggen.Manderang antangtangna chanchiaigiparang,tangkana kasagiparang,,gaoraa degiparang,dala dakgiparang,kasaninggijagiparang,maa-paarangko manijagiparang,mittela grigiparang,rongtalgijagparang,kragija dakgiparang,kema kagijagiparang,mitakgiparang,antangtangko rakkigijagiparang,mangnamgijagiparang,namako mitchigiparang,togigiparang,chanchisogijagiparang jangbingbanggiparang,Isolna kasaana bate sukna kasagiparang,bimingna torom manigiparang,aro uni bilko jechakgiparang onggen.Indakgiparangoni antangtangko rakkibo.

MANDENI UIANIRANG: Daalo Mandeni uianirangko niaton aiao inmanbea !Science aro Technology anching chasonggitalo namen tangdoaha.Daniel 12:4-o iako agansoa,” Indiba naa , O Daniel , ua kattarangko chipchangbo, aro bonkaman salona kingking kitapko mohor subo; bangan ichi uchi dariruragen aro uiani bangrorogen.” Daalo iani chongmotko anching noktangon ao jaktangon nikata aro niatna manaia. Agilsak gimikko saksachi sason kaani giminba agilsak gimikni dilgiparang chanchibewale daalo World Order Declaraion-koba parakmanaha.Jean Kristoko jegale (Anti-Christ) matburingni chinko rachinaba dragen, uaranga micro-chiefs-ko Mandeni beeno chipe uako pilak kamna jakkalna aro cashless society ba tangkako gimaate uachin je kamnaba choliatna remikkangani onga,jean matburingni chinko raaniba onggen.

SASON KAANI CHINRANG: Jisu-ni rebapilani somoio agilsako sason kaaniko sastroo sesoaha. Skanggipao Gipin Asongrang Israel asongni kosako chakatgen. Ia bilsion ia abachengaha,indiba daalo dikdiksa songgigrike jripe dongenga.Iako Zekaria 12:2-3-o agansoaha. Gnigipa, Asongangni nangrimachi kam kagen jechin Kristoko champenggipana (Anti Christ) rama tarisoani ba chol osoaniba onga.( Dan.2:41-44,7:7,8. Para.1712-13) Gittamgipa chin jatsara jatsani kosako chakatgen aro dakgrik dinggrikani onggen.(Mati 24:6-7,12).

BONATANI: Daalo ia chinrangko niksoe nisoe anching antangtangko , nokdangtangni manderangko tarisona sal somoirang ongenga. “’ Unigimin sal manmittingon, anching pilaknan,dingtangmancha beberaani madrangna ,namako dakna hai.(Galati^6:10)…” Indiba saoba antangnirangna,mongsongde antang nokni manderangna,chanchisojaode,ua beberaako jechakaha aro beberagijana bate namjabata.(1 Tim.5:8).

Achik Git No.345-o ring’a.

Aan sukrang gimachong Jisu angnin;’

Kasaarang ekangchong Jisu angnin,

Andala agilsak gri nengtakram biap

Jisuosan katnap Jisu angnin!